Gedanken und Erlebnisse von Dora Eggimann-Schütz
Guete Obe mitenang
Dä Marsch, wo dir vo üs Drüne grad ghört heit, isch dr erscht Marsch gsi, wo d Jugendmusig het gspieut. Es isch dr Miss Liberty vom Karl Lawrence King gsi. Der Ruedi het ihm immer Miss Libeeerty gseit.
I ha d Jugendmusig vo 1974–1992 begleitet u verzeue nech itz chli öppis us dere Zit.
Wie hüt, het me sech ou scho früecher Gedanke gmacht, wie me Musikante-Nachwuchs chönnti gwinne.
Dr damalig Dirigänt Fankhuser Hansruedi, dr Röthlisberger Ruedi (wo du d Jugendmusig bis Aafang 1996 het dirigiert), dr Schütz Franz junior u dr Bürgi Bänu
hei 1974 äs Informationsschriebe verschickt fürne Jugendmusig ds gründe.
So si du gäge 30 jungi Lüt im Gmeinssau ghocket u hei mit Inträsse dene Manne zueglost. Die Jüngschte si 10ni u di Eutischte 18ni gsi.
Jedes het du si Instrumänte-Wunsch dörfe üssere. Fasch aui hei Klarinette oder Flöte gseit, aber, oha lätz, us däm isch du nüt worde. Es isch üs gseit worde, es gäbi nume Bläch, si heigi niemer für Houz. Im erschte Momänt isch d Enttüschig gross gsi, aber mi het sech dri gschickt.
Us däm nume Bläch, isch mit de verblibene 18 Ching vo däm Info-Obe, schnäu ä schpieubari Jugendmusig worde. Scho 1976 het me am Chilekonzärt vor Wase-Musig, am 1. Ougschte wie ou am Empfang vor Wase-Musig, wo vom Eidg. Musigfest z Biel isch hei cho, chönne ufträtte.
S absolute Highlight im 76gi isch d Reis nach Meiringe gsi, für go z luege, wie sone Jugendmusigtag ablouft. U so isches cho, dass mir 1977 z Zollikofe ou hei mitgmacht. No mänge Jugendmusigtag isch derzue cho. So ou im 88gi, wo d Jugendmusig mit zwöine sehr guet, vom Eidgenössische Jugendmusigfescht z Interlake isch hei cho.
1978 si mer scho uf 31 Jungmusigkante agwachse gsi.
Am Outo-Parcour vom AMI-Club wie ou am Hoschtetfescht vor Wase-Musig het d Jugendmusig ä Luftgwehr-Schiessbude betriebe. Mir Junge hei das natürlech sehr gärn gmacht. Äso het me z Kässeli, wo fasch gäng isch läär gsi, o no grad chli chönne ufbessere.
Ab 1981 hei mir ir Oula eigeti Johreskonzärt chönne gä.
Ar Fahneweih vor Wase-Musig, am 20. u 21. Juni 81, het ou d Jugendmusig ä Fahne übercho. D Jugendmusig Zäziwil isch üse Fahnegötti worde. Am 27. Septämber im gliche Johr simer uf Adelbode is erschte Jugendmusiglager greiset. Die Lager si mängs Johr sehr beliebt gsi! D Wase-Musig het aube äs Söili gspändet. Dr Lagerchoch Bänu, wo isch Metzger gsi, hets mit dr tatchräftige Mithiuf vom Dirigänt, ihr Metzgerei Wirth, i, fürs Lager bruchbari Teili, verarbeitet. Gwurschtet hei si de bim Dirigänt im Mieschbode-Schuelhus.
Mit däm Glöggli, wo mir ar Fahneweih hei übercho, isch i de ide Lager fasch immer gweckt worde.
Z Verzeue us dene Lager gubs ä Huufe: z. B. d Spaghetti, wo si cho z Flüge u am Bode glandet si, mi het se zämegläse u gässe – oder d Nachtbuebe, wo d Notfauleitere am Huus abe si u du nachere unfreiwiuige Wasserduschi gleitig wieder ueche si verschwunde. Churz druf isch himmlischi Rueh ide Zimmer ikehrt.
Im Lagerbricht vom 82gi isch z läse: Wie jedes Johr het ou ä Parcour nid dörfe fähle. Die gfitzte Leiter si scho ade Pöschte zwäg gstange für üses Wüsse z teschte. Ganz wüssbegierig hei si nach Taktarte, Tonarte, Ortschafte, em Auter vome Bart u süsch no Auerlei gfrogt. Z letscht hättme no söue dr Ton «C» preiche. Dä Ton hetme de nid öppe müesse singe oder spiele, nenei, mit eme Luftgwehr hättme dä Chätzer söue preiche.
Vo Eutere isch mir gseit worde, ihri Ching sigi nume id Jugendmusig cho wüu die Lager so schön sigi.
Aus Gschänk für d Jugendmusig Länk im 89gi het der Karl Hofer ä Marsch komponiert. Mir hei nim dr Name «Vom Ämmitau ids Simmitau» gä. Wöue heter nüt derfür. Är het gseit: «Spielit nä, so lang wie dir Fröid drann heit, u när gheiitnä furt.
Bider Verteilig vode Instrumänt isch gäng druuf gluegt worde, dass si ir Jugendmusig usgwoge verträte si. Vorem Übertritt id Jugendmusig si di benötigte Instrumänt ufä Bode gleit worde u jedes Ching het eis dörfe nä. Wo du ou einisch ä Bass isch derbi gsi, het dr Leiter gseit: «Dä wo dr Bass nimmt, het de ä äxtra Portsion Schoggi z guet.» Do het sech dr Schoggi-Narr Wale sofort für dä Bass entschiede u isch ihm sis Läbe lang tröi bliebe.
Ganz mänge, wo einisch aus Jugendmusikant het agfange, het spöter äs Ämtli überno. Ob aus Presidänt oder Gruppeleiter, eifach aus wos brucht, für dases d Jugendmusig hüt no git.
I säuber ha eigentlech gar nid wöuä Musig mache. Äs Schueugschpändli het mi gfrogt, öbi ou mitchöm a dä Informationsalass im 74gi. Sie isch nume denn cho, mi hets nümm lo go – ou weni ke Klarinette ha übercho. Aus Ching hani Flüguhorn gspieut, bis Mitti 2011 Cornet, u itze bini glücklech mitem Es-Horn.
Was lere mir druus? Weles Instrumänt me am Afang het, spieut gar nid sone Rouä, d Fröid mitenang Musig z mache isch eifach schön u vieu wichtiger. Drum, probierits doch eifach ou uus.
