Gedanken und Erlebnisse von Barbara Habegger (Babs) und Thomas Niederhauser (Hägi)
Babs: Säg Hägi, was chunnt dir so i Sinn, wett a dini Zyt ir Jugendmusig zrugg dänksch?
Hägi: Wo i mir ha afo Gedanke mache, wasi zum Thema Jugendmusig chönnt verzeue, hani feschtgsteut, dasi mi zwar a verschiedeni Episode erinnere, aber gar nüm gnau cha säge, wenn, dass was stattgfunge het. Dasi mi ha afo a Persone erinnere, woni scho lang nümm ase dänkt ha u mi ha afo froge, was äch die hüt mache. Plötzlech hani realisiert, wie lang, dass das zum Teu scho här isch u die nöchschte Gedanke hei sech de ums Thema Alters-Erschinige dräit.
Aber das isch jo itz nid s diräkteThema.
Babs: Was het d Jugendmusig für di fürne Bedütig gha?
Hägi: Näbscht dr Schueu isches für mi dä Ort gsi, woni glehrt ha, was Kameradschaft u Fründschaft bedütet. Wie, dassme mit Lüt umgeit, wes harmoniert, aber o, wiemes macht, weme s Heu haut nid uf dr gliche Bühni het. Dases normau isch, dass teu irgendwenn neu derbi si, wome cha lehre kenne u angeri haut plötzlech verschwinde, wöu si ufhöre u nüm mithäufe.
Babs: Ja gäu, mi het viu glehrt übers soziale Umfäud. Es git Mönsche, wome no hüt regumässig gseht u mit e ztüe het, oder äbe o die, wo chli us däm Umfäud verschwunde si. Scho nume drum si mir so gspannt gsi, was für Gsichter, me hüt aus wird aträffe.
Babs: Was isch de dir us dr Zyt aus Jugendmusikant am meischte i Erinnerig blibe?
Hägi: Us Sicht vom Jugendmusikant isch für mi vorauem s Trio Ruedi Röthlisberger, Jürg Marthaler u Bürgi Bänu usde alte Lagerzyte untrennbar mit dr Jugendmusig verbunge. Glichzytig hani erstunt feschtgsteut, wie viu dasme vo denn chli vergässe het, ume ganz töif muess go grüble, dass me sech wieder dra erinneret.
S zwöite, wo d Juendmusig mi prägt het, isch dr Begriff Teamplayer. Weme äs Musigstück irgendeinisch wott präsentiere, u zwar so, dass nid aui dervo loufe, muessme dranne schaffe. Es brucht Energie u Isatz vo jedem Einzelne, aber äs brucht vor auem o e gueti Teamleistig. Nume we aui zäme schaffe u jede sini Roue im Team probiert z finge, funktionierts guet. Dasch jo nid nume bim Musig mache so.
Das isch uf jede Fau ä Punkt, woni persöhnlech sehr viu glehrt ha.
Ganz sicher, dasses Spass macht, u dassme Fröid drann het, isch entscheidend, u nid z letscht d Kameradschaft. Bim Bügle würde mer vom Arbeitsklima rede. Das si aus Sache, wo denn ä Teil vor Jugendmusig si gsi u sicher hüt o no si. S schöne für mi isch immer gsi, u das isch denn immer wieder gseit worde: «Äs wird jede mitgschleipft –vom Jüngschte bis zum Eutischte!» Das isch z. B. ä Spirit, wome bi üs ir Wase-Musig no hüt gspürt.
Irgendwenn ischme när vom Musikant zum Registerleiter worde u het chönne afo Verantwortig übernäh. Ou das si schlussändlech Erfahrige gsi, woni wieder dervo profitiert ha. Me het z. B. gmerkt, dasses gar nid so eifach isch, weme vori no dr Kolleg isch gsi, wo hiuft irgend ä Blödsinn us z hecke u churz drufabe dä isch, wo seit, was u wie dassmes itz macht.
I erinnere mi do ane Gschicht, u i wirde ke Name nenne, wo plötzlech e Musikant ke Ton u ke Luft me dürs Instrumänt brocht het. Mi isch dere Sach ufe Grund u het gmerkt, dass s Mundstück komplett verstopft isch. Nach chli Nochefroge isch du uscho, dass dä Musikant mitem Mundstück bimene Öpfu ä dunkle Fläcke het wöue usstäche. Mir hei das Instrumänt du emu wieder zum Loufe brocht.
Nachem Registerleiter isch dr Lagerleiter cho, wo no für chli meh isch zueständig gsi. Me het gmerkt, dassme säuber ufs Mou a dere Position isch, wome früecher aube chli dra ueche gluegt het. Grad di Musiglager si öpis, womer am meichste Erinnerige i Sinn chöme. Gueti u schlächti, wichtegi u unwichtegi u vilech o seregi, woni hüt ganz sicher nid verzeue. Aui hei do ihrer eigete Gschichte!
Ei Punkt, womer uf jedefau i Sinn chunnt, isch «Nachtrueh u Tagwach». Beidi si irgendwie untrennbar verbunge gsi u vorauem bi aune extrem beliebt. Bir Nachtrueh isches scho fasch e Sport gsi, sech nid loh z verwütsche, weme no nid wott schlofe, z lut isch u sech im Schaft oder süsch irgendwo versteckt, dass dr Lagerleiter eim nid verwütscht, wener Kontrolle macht. Aber schlussändlech ischme jo säuber früecher nid besser gsi u hets kennt. I has uf jede Fau sportlech gno u nid Ärnschter aus nötig.
Für Tagwach hetme am Afang e Glogge brucht. I weis nid, ob die no existiert, aber ghört het me se aube u wach gsi ischme ou. Es het du schlussändlech mou ä Protescht gä, das sig schlicht z brutal am Morge früech. Mir si du uf d Idee cho, dass jo jede Morge ä Gruppe Musikante die Tagwachh chönnt mache. Das het funktioniert u meistens hei die das mite Instrumänt gmacht. I bhoupte no hüt, dass das wäsentlech brutaler isch gsi aus jedi Glogge!
Babs: 1998 hets de dr Zämeschluss mit Sumiswald gäh. Ä wichtige Schritt i dr Gschicht vor Jugendmusig.
Hägi: Genau. Wie überau, Zyte ändere sech u i weiss tatsächlech nüm gnau, i welem Johr, aber o i ha mi aus musikalische Leiter probiert.
Babs: Öppe vo 2002 a hei du, dr Wale Rutschi u dr Ländu Niederhuser zäme d Jugendmusig gleitet. Denn ungfähr bi i nämlech derzue cho. Äs starchs Trio sit dir gsi u d Abwächslig mit euch drei hei di Probe mega churzwylig u spannend gmacht.
Hägi: Ou das het nöii Erfahrige brocht. Mi luegts z. B. nid glich a, das nid aui s gliche Talänt, die glichi Fröid oder dr glich Ifer für öpis hei, weme vore drann steit oder weme ir Gruppe inne hocket. Für mi isch aber o denn klar gsi, dass d Idee «äs wird jede mitgschleipft» muess witergo.
O i dere Zyt si nöii Lüt derzue cho u äs paar hei haut o ufghört. Leider het me gmerkt, dasses meh si, wo nüm chöme aus seregi, wo neu derbi si. Das isch ä Trend, wome gloub nid nume bi üs festgsteut het. Me het afo Ideen entwickle, wasme aus chönnt mache dergäge, aber das isch gar nid so eifach gsi. Gründ hets sicher verschiedeni gä.
Babs: Ja, die Zyte hei sech haut scho gänderet. Bimne Lager bini nämlech nie derbi gsi. Aber mir hei süsch ganz viu ungernoh. So mah i mi no sehr guet a das Jugendmusigfescht 2007 in Spiez bsinne. Unvergässe si ou die viele Schitäg, wo mir zäme erläbt hei.
Babs: U när isches mir wie dir gange: I ha mi afo fürs Dirigiere interessiere u nacheme churze Chrash-Kurs hani mit dir u em Hänu Schüpbach d Leitig vor Jugendmusig überno.
Hägi: Plötzlech hani när säuber gmerkt, dasses itz Zyt isch. Zyt, chli uf Distanz z go u angeri Prioritäte z setze, aber o Zyt, dass nöii Lüt mit nöie Ideene u früscher Energie chöme.
Babs: Mir hei Diverses usprobiert, aber d Zau vode Jugendmusikante isch immer meh zrugg gange. Für glich wider chly ire grössere Gruppe chönne zäme z spile, hei mir im 2015 es Revival vom Projekt WYWASU a d Hang gno. A däm Probeweekend im Eriz bini de doch no i Gnuss vo dere bekannte Tagwach cho …. I dere Bsetzig hei mir de ou am Musigtag z Rüederswil ä Uftritt gha u dert hei mir sogar no Marschmusig gmacht. Läck ha i Schiss gha, dasi dä Stäcke la la gheie!
Babs: Es witers spannends Projekt isch im 2019 die gmeinsami Teilnahm am Schwiizer Jugendmusigfescht z Burgdorf mit dr JM Landiswil gsi. Vo denn a het dr Janick Zappa d Leitig vor Jugendmusig übernoh. Mir si aui dankbar um sis riisige Engagement für d Jugendmusig u fröie üs über hoffentlech no mängs Konzärt unger sire Leitig.
Hägi: I bi froh, dasi ä Teu vor Jugendmusig-Gschicht cha si, u froh für das, woni aus glehrt u erläbt ha. U ganz wichtig: I gloube, hüt isch äs super Team am Start, wo sech drum kümmeret u i bi absolut sicher, dass di Gschicht no lang witergeit.
Babs: Das gloube i ou. Ou i möcht die Zyt ir Jugendmusig nid misse. So viu Bekanntschafte, Fründschafte u ganz e Huufe emotionali Erinnerige ha i us dere Zyt mitgno. Stosse mir zäme a: Uf d Jugendmusig!
Prost!
Hägi & Babs
